BAGUIO CITY – Idauluan ni Baguio City Mayor Benjamin Magalong ti panakabukel dagiti contingency measures wenno addang kontra iti Delta wenno Indian variant ti COVID-19.
Kagiddan daytoy ti panangipeksana iti alarma iti nasao a variant ti COVID-19 nga ad-adda a naparpartak a maiyakar ken nakarkaro ti epektona.
Sigun kenkuana, nakarkaro ti agbalin nga epekto daytoy iti kanito nga adda ti makaptan iti nasao a variant ditoy siudad isut gapuna a nasken a pagsaganaan daytoy dagiti amin nga umili.
Kinunana a babaen iti daytoy ket saan la unay a maapektaran ti health system ti Baguio.
Gapu iti daytoy, impalagip manen ti mayor ti panagsurot dagiti umili iti minimum public health standards tapno masalwadan iti tunggal maysa kontra iti Delta variant ti COVID-19.
Innayonna a maituloy latta ti panagsuot ti face shield iti kanito a rumuar iti pagtaengan.
Imbilinna metten ti panangiwaras ti City General Services Office kadagiti donasyon a facemask ken face shield kadagiti personnel ti lokal a gobierno ti siudad ken ti panangiyemplementar ti pulisya iti minimum public health standards.
