BAGUIO CITY – Sinukimat da Presidential Spokesperson Harry Roque ken National Action Plan Against COVID-19 Deputy Chief Implementer Vince Dizon, kadwada ni Contact Tracing Czar ken City Mayor Benjamin Magalong dagiti establishimiento iti sentro ti Baguio ken ti centralized triage center ti Baguio.
Iti interview kenni Roque, impannakkelna ti panagbalin a pioneer ti Baguio iti panaglukat ti turismo iti entero a pagilian iti sidong ti agdama a new normal.
Kinunana a napaneknekan ti siudad a saan a rumbeng a maisakripisyo ti ekonomiya para laeng iti salun-at dagiti umili gaputa mabalin a maituloy ti panagtrabaho dagitoy la ketdi adda ti panagannad.
Sigun kenkuana, babaen daytoy iti nainget nga implementasyon dagiti minimim health standards, cashless transaction ken ti epektibo unay a centralized triage procedures para kadagiti sumsumrek iti siudad.
Innayon ni Roque a rumbeng laeng a tuladen daytoy dagiti dadduma pay a lokal a gobyerno iti pagilian tapnu manayonan met dagiti aglukat iti turismo.
Kabayatanna, kinuna met ni Dizon a makitkitanan ti new normal ditoy siudad no sadino, nagsublin ti sigud a garaw dagiti tattao sakbay pay ti pandemya ngem addaan laeng ita iti panag-annad.
Naituding a mailukat ti tourism bubble iti nagbaetan ti Baguio City ken Region 1 wenno Ilocos Region inton Martes, September 22.
