Makidkiddaw ita ti panagbalin a visible dagiti traffic enforcer a mangimanmando iti gunay ti trapiko iti nagduduma a kalsada nangruna iti intersection ti siudad ti Baguio.
Kasaruno daytoy ti panangilawlawag ni Rose Canda, motorcycle rider seknan iti napasamak a panakasitana iti kalsada a paset ti Magsaysay Avenue idi Lunes.
Iti exclusive interview ti Bombo Radyo kenkuana, kinunana a naklaat ken saanna a napansin ti traffic enforcer iti nasao a kalsada rason nu apay nga intuloyna a dimmalyasat gapu ta naka-green light daytoy.
Sigun kenni Canda, saan a nakatengnga ti traffic enforcer ken naudi a napansinna daytoy bayat a nalito daytoy nu anya ti masurot nu ti traffic light wenno ti traffic enforcer.
Dagus met a pinaigid ti nasao a traffic enforcer daytoy ken naipaayan ti ticket.
Kinuna ni Canda a napigsa ti boses ti traffic enforcer ken nariknana a naibabain daytoy nupay kasta, inaklonna nga adda metlaeng ti kamalina iti nasao nga insidente.
Gapu dayta, kiddawna pay ti panagblink laengen wenno panaka-iddep dagiti traffic light nu adda dagiti traffic enforcer kadagiti kalkalsada a pakaimanmando-an ti gunay ti trapiko.
Nalpasen met a binayadan ni Canda ti violation ticket daytoy.
Maipalagip nga immunan nga inlawlawag ni PLtCol. Zacharias Dausen, dadaulo ti Traffic Enforcement Unit a saan pay a posible ti panakaiddep dagiti traffic lights iti maysa a partikular a paset ti Central Business District gapu ta nakakonektar daytoy kadagiti daduma pay a kalsada iti siudad.
Innayon pay ni PLtCol. Zacharias Dausen a nu adda dagiti traffic enforcer nga agmanmando iti kalsada ket masapol a dagitoy ti masurot.//Bombo Mera Pacpacan
