BAGUIO CITY – Nailukaten ti kabaruan a ruta ti transportasyon sadiay Moutain Province a pagbiahean dagiti moderno a lugan.
Kasaruno daytoy ti panakaipalubos ti panagbiahen ti 15 a Class 3 units ti moderno a public utility jeepney ti Bontoc Abatan Bauko Transport Service Cooperative (BABTSC).
Agbiahe dagitoy iti ruta a Bontoc-Abatan, Bauko a buklen ti ruta ti Bontoc-Dantay-Alab-Balili-Gonogon-Nacagang ken Sabangan-Supang-Otucan-Poblacion-Abatan, Bauko.
Imbilin met ni LTFRB-Cordillera OIC-Regional Director Engr. Lalaine Sobremonte ti panangpapartak dagiti opisyales ti Mountain Province iti panangbukelda iti bukod a Local Public Transport Plan (LPTRP) ti probinsia.
Dinayaw na met ti Montañosa iti panagbalin daytoy a maikadua a lokal a gobyerno iti Cordillera Region iti tay-ak ti kaaduan iti bilang dagiti moderno a lugan nga agbibiahe iti masakupan daytoy.
Inawagan met ni Congressman Maximo Dalog Jr. ti BABTSC ken dagiti drivers dagiti parapasahero a jeep kas public servants kagiddan ti panangipeksana iti panangsuportarna kadagiti moderno a parapasahero a lugan nga agbibiahe ita sadiay Mountain Province para iti pagnam-ayan ken kinatalged dagiti umili.
