BAGUIO CITY – Napagnumuan ti lokal a gobyerno ti Baguio ken nagduduma a grupo dagiti parapasahero a jeep iti siudad a mailaylayon ti panagbiaheda agingga iti alas-nuebe trenta ti rabii ken agbalin nga innaldaw ti panagbiahe dagitoy.
Sungbat daytoy ti lokal a gobyerno ti Baguio iti reklamo dagiti pasahero nga atiddog a pila dagitoy kadagiti paradaan dagiti parapasahero a jeep tunggal rabii, pakairamanan dagiti sumagmamano a ruta nga addaan limitado a panagbiahe iti agingga alas-siete wenno alas-otso ti rabii.
Nupay kasta, kinuna ni Engr. Januario Borillo, dadaulo ti Traffic and Transport Management Division ti City Engineering Office a mailaksid iti katulagan ti ruta ti Aurora Hill ken Trancoville nga addaan ti sag-100 nga yunit.
Innayonna a napagbalin a 70 percent ti kapasidad dagiti parapasahero a jeep a makatulong iti panakanayon ti mapastrekan dagiti drivers.
