BAGUIO CITY – Kaaduan kadagiti grupo dagiti jeepney drivers ken operators ditoy Baguio City ket adda paylaeng iti proseso ti consolidation wenno ti panagbukel dagitoy iti kooperatiba wenno korporasyon a maitunos iti PUV Modernization Program.
Iti interview ti Bombo Radyo Baguio, kinuna ni Rey Bacoco, dadaulo ti maysa a transport group ditoy lokalidad a manarimaan ti consolidationda para iti panagbukelda iti maysa a korporasyon.
Nupay kasta, kinunana a pakaseknanda ti panagala kadagiti baro nga yunit ti moderno a jeep gaputa nangina dagitoy wenno maysa nga yunit ket aggatad ti dumanon P2-M.
Dinakamatna a saanda a basta agaplikar iti bangko para iti panakagatang dagiti nasao nga yunit ti moderno a lugan gaputa nasken pay a maamuan ti kapasidadda a mangbayad iti utangenda a panggatang iti baro a jeep.
Innayonna a nasken pay a maadal dagiti dadduma a pakaseknan kas iti panagilet dagiti kalsada gapu iti kadakkel dagiti baro a jeep ken kaadda ti nalawa a pagparadaan kadagitoy.
Kukuwestionaran pay ti grupoda ti pakaiturongan dagiti tradisyonal wenno agdama a jeep dagitoy iti kanito a masukatan iti moderno a jeep.
Gapu iti daytoy, ur-urayen latta ti grupoda dagiti kanayonan a pagalagadan mainaig kadagiti pakaseknan ti grupoda sakbayda nga agsukat iti baro wenno moderno a jeep.
