BAGUIO CITY- Nainget a tuttutukan ti Baguio City Police Office dagiti menor de edad a maatap a miembro dagiti gang wenno street gangs iti siudad.
Iti interview ti Bombo Radyo Baguio kenni BCPO- Comunity Development Affairs Unit Head PLT.COL. JUDY JASMIN PALICOS, kinunana nga haan pay nga validated kas miembro dagiti gangs a karaman kadagiti napalpalabas nga insidente a nairaman ti grupo dagiti agtutubo wenno menor de edad iti siudad.
Sigun kenkuana, agtultuloy ti assessmentda iti nasao nga banag nangruna iti panagsubli ti face to face to classes ken panakalukay ti restrictions kadagiti ubbing.
Kinunana a kabayatan ti nawaya a panagturong dagity iti parapubliko a lugar, agrugrugi metten ti organisasyon ti grupo dagiti menor de edad.
Impaganetgetna a babaen iti nainget a panagwanawanda ket maliklikan ti plano wenno organisasyon dagiti ubbing iti aniaman a grupo wenno gangs.
Ipalpalagipna manen ti ordinansia ti siudad a panakaiparit ti organisasyon wenno panangidaulo ti street gang ken panagrecruit kadagiti menor de edad a makipaset iti aniaman nga street gang violence.
Inyunay-unayna pay a sumango iti naituding a pannusa dagiti saan a menor de edad a lumabsing iti ordinansa.
Kagiddan iti dayta, kidkiddawen met ni Palicos kadagiti agtutubo wenno indibidual a biktima dagiti maatap a grupo ti a mangdangdangran kadagiti parapubliko a dagusda nga iyumanda kadagiti otoridad.
Sigun kenkuana, awan ti dakesna a mangipablaak iti social media tapnu mapakdaaran dagiti umili ngem nasaysayaat a dagus a maiyuman kadagiti otoridad tapnu dagus met a maaksionan.
Inayonna nga adu ti naiwaras nga kapulisan kadagiti kangrunaan wenno parapubliko a lugar iti siudad rason nga awan ti pagbutngan ti publiko nga agpaarayat nu kasapulan.
Babaen iti daytoy ket dagus a matiliw wenno mabigbig dagiti indibidual a mangituntunda iti panagbuteng ti kaadoan wenno ti panakailista ti krimen.
