Indeklara ti Commission on Audit (COA) nga “overpriced” ti P95.3 milion ti panaggatang ti lokal a gobierno ti siudad ti Baguio iti dua a daga idiay Tuba, Benguet idi tawen 2023.
Iti 2024 annual audit report, kinuna ti nasao nga ahensia a ti panaggatang ti dua a daga ket para iti development and socialized housing programs.
Nupay kasta, maibagbaga a ti pakaseknan ti presio ket rimmuar gaputa saan a naki-negotiate ti lokal a gobierno iti siudad tapno makessayan ti presio iti tunggal square meter.
Iti report ti Commission on Audit, ti purchase price ti siudad ket P101,465,425.53 ( karamanen ditoy ti capital gains tax ken documentary stamp tax), ken ti P95,377,500 a bayad iti vendor ket nalabes a nangatngato ngem ti Bureau of Internal Revenue (BIR) Zonal valuation a P635,850, ken ti Fair Market Value tunggal Tax Declaration ket P141,190.
Gapu iti dayta, nangidatag dagiti auditors ti COA iti isyu maipapan iti “reasonableness” ti gatad ti panaggatang, a nakabasar iti indiaya ti vendor a presio nga P1,500 tunggal square meter.
Naduktalan pay iti audit team ti presyo nga “excessively high” nu idilig iti BIR Zonal valuation a P10 tunggal square meter.
Gapu iti dayta, inrekomendar ti COA a rumbeng a mangisubmitir ti siudad iti Baguio iti “justifications” seknan ti panaggatangda kadagiti lote idiay Tuba.
Ti panaggatang kadagiti daga ket maysa kadagiti reklamo idi ni sigud a councilor Maria Mylen Victoria G. Yaranon kontra kenni Baguio City Mayor Benjamin Magalong iti Office of the Ombudsman. Sigun kenni Yaranon, kayatna a makasuan ni Magalong gapu iti panaglabsingna iti graft.
Ngem idi laeng July, dinalusan ti Ombudsman ni Magalong iti mapapati a kriminal ken administratibo a reklamo kontra kenkuana gaputa awan ti umdas nga ebidensia tapno mapabasol daytoy.
