Nainget a maipawpawil ti panangitugot kadagiti natatadem nga igam, arak ken dadduma pay kadagiti sementeryo kagiddan ti panaka-obserbar ti All Souls Day ken All Saints Day.
Iti panakiuman ti Bombo Radyo kenni Police Lieutenant Colonel Zacarias Dausen, dadaulo iti La Trinidad Police Station kinunana a maipawil metlaeng ti panangitugot iti arak ken sound systems iti uneg ti sementeryo.
Daytoy ket tapno maliklikan ti aniaman nga insidente bayat ti panagbisita kadagiti pimmusay nga ay-ayaten iti biyag.
Kagiddan dayta, nagpalagip daytoy kadagiti motorista a magna kadagiti alternatibo a ruta tapno maliklikan ti nailet a gunay ti trapiko.
Kabayatanna, innayonna pay a limitado laeng dagiti pagparadaan rason a drop and go laeng ti ar-aramiden dagitoy.
Naglukat metten ti Bugayan Pyramid Cemetery ita nga 6 iti agsapa agingga inton alas syete inton rabii bayat nga aglukat dagiti public cemetery inton 8 iti agsapa agingga alas singko iti malem.
Kagiddan dayta, impasiguradona iti publiko a nakasagana dagitoy nangruna ket dumanon iti 110 nga otoridad ti naideploy kadagiti nagduduma a sementeryo iti nasao a munisipyo.
