Maiyunay-unay kadagiti kandidato a maipawil nga agkampanya dagitoy inton bigat, Maundy Thursday agingga inton Good Friday.
Iti panakiuman ti Bombo Radyo kenni Atty. John Paul Martin, election officer iti siudad, kinunana nga aldaw daytoy nga aginana dagiti kandidato kas panangrespeto, panagreflect ken panagngilinda ita a semana santa.
Sigun kenni Atty. Martin, kalpasan ti dua nga aldaw a panaginanada ket mabalin nga ag-full blast dagitoy iti panagsublida nga agkampanya inton Sabado nangruna ket mano laeng nga aldaw ti nabatbati sakbay ti eleksyon.
Insuhestiyon met ti election officer iti siudad kadagiti botante nga agdamagda kadagiti kandidato no anya dagiti platapormada ken daduma pay nga impormasyon.
Kabayatanna, umap-apela ni Atty. Martin kadagiti kandidato a kitaenda a nalaing dagiti postersda no dagitoy ket nakaurnos a nakakabit ken ti panagtulnogda iti pagalagadan ti Commission on Elections.
