BAGUIO CITY – Impetteng ti maysa a dermatologist a saan a nasayaat iti salun-at ti panagpa-inject ti gluta drip wenno IV drip agsipud ta adu dagiti negatibo nga epekto daytoy.
Iti interview ti Bombo Radyo, imbinsa-binsa ni Dr. Faith B. Kishi Genarao dagiti negatibo nga epekto ti panagpa-inject ti gluta drip wenno IV drip iti bagi ti maysa a tao.
Mabalin a maaddaan ti rushes iti entero a bagi, mabalin a lumteg ti ima, ken mangitunda pay daytoy iti pannakatay ti maysa nga indibidual.
Gapu iti daytoy, inyunay-unay ni Dra. Faith a liklikan ti panangpa-inject iti gluta nangruna ta saan daytoy nga inaprubaran ti Food and Drug Administration (FDA).
Kabayatanna, impeksa ni Dr. Faith nga adda dagiti dadduma a wagas tapno magun-od ti napudaw a kudil kas ti panagsida ti nateng ken pannangan ti prutas.
Malaksid iti daytoy, dinakamatna a liklikan ti agbabad iti init tapno saan a madadael ti kudil.//Rosemarie Bulsao
