BAGUIO CITY – Agtultuloy latta ti panagbiahe dagiti jeepney drivers sadiay La Trinidad, Benguet iti baet ti agtultuloy a panagngato ti presyo ti produkto a petrolyo.
Iti panakiuman ti Bombo Radyo Baguio, kinuna ni Miguel Luma-ang, presidente ti Federation of Jeepney Association ti La Trinidad, agtaltalinaed ti 600 a patta-patta a bilang dagiti agbibiahe a jeepney drivers iti ruta ti La Trinidad-Bokawkan ken La Trinidad-Magsaysay.
Impeksana nga uray bassit ti mapaspastrekkan ita dagiti drivers ket agtultuloy latta ti panagbiahe dagitoy gaputa daytoy laeng ti namnamaenda a pangbiagda kadagiti pamilyada.
Impettengna nga agingga ita ket mangnamnamada a patgan ti Land Transportation Franchising and Regulatory Board ti kiddawda a maipangato ti minimum a plete iti P12.
Innayon ni Luma-ang a kiddawenda metlaeng iti lokal a gobyerno ti Baguio City tapno ipalubosda ti inaldaw a panagbiahe dagiti jeep manipud La Trinidad malaksid laeng iti coding gaputa sursurotenda ita ti odd- even scheme.
Impaganetgetna a babaen iti daytoy ket manayonan ti aldaw a panagpasada dagiti jeepney drivers tapno makasubbotda manipud kadagiti lugida nangruna ta umad-ado metten dagiti pasahero.
Inyunay-unay met ni Luma-ang nga iti baet ti nangato a presyo ti produkto a petrolyo ket isubsubli latta dagiti drivers ti barya dagiti pasahero ngem pagyamyamannanda dagiti sumagmamano a pasahero a saanen a mang-awat pay iti dua pesos wenno tallo pesos a barya dagitoy.
