Agtultuloy latta ti panagregget dagiti maseknan nga opisyal idiay Poblacion, Buyagan, La Trinidad, Benguet para iti linak ken kappia.
Iti pannakiuman ti Bombo Radyo kenni Buyagan Barangay Kagawad Julian Pelitan Jr., kinunana a maysa kadagiti ar-aramiden dagitoy ket ti nainget a panangipatungpalda iti curfew partikular kadagiti balay paginuman.
Nupay kasta, adda latta dagiti sumagmamano nga establisiemento nga aglablabsing iti nasao nga ordinansa.
Gapu iti daytoy, kidkiddawen ti nasao nga opisyal kadagiti agtagikua kadagiti nadakamat nga establisiento a sumurot dagitoy kadagiti pagalagadan para iti natalna nga aglawlaw partikular iti rabii.
Iti sabali a bangir, agbalbalin metlaeng a parikut kadakuada dagiti walang nga aso kadagiti kalkalsada iti nasao metlaeng a barangay.
Innayonna a saan latta a maliklikan nga adda dagiti agkaiwara nga aso gapu ta patienna a mamingsan ket maliwayan dagitoy.
Gapu iti daytoy, maipalpalagip kadagiti umili a kitaenda dagiti taraken dagitoy sakbay a rumuarda iti pagtaenganda.
