BAGUIO CITY – Ibalballaag ti Baguio City Tourism Office ti panagrehisto dagiti turista kadagiti lehitimo weno akreditado nga hotel ken accomodation establishments tapnu saanda a mabiktima dagiti scammers wenno maloko.
Iti interview ti Bombo Radyo Baguio, insingasing ni City Tourism Officer Engr. Aloysius Mapalo a napinpinatas nu agrehistro wenno aramaten laengen ti VISITA App ti siudad.
Sigun kenkuna, makita amin dagiti lehitimo weno akreditado nga accomodation establishments apaman a nakarehistrodan iti aplikasyon.
Makita amin iti Baguio VISITA dagiti nasurok 700 nga hotel ken accomation establishments a a mabalinda nga pagdagusan tapnu maliklinda ti ma-scam.
Inyunay-unayna a saan met a parikot ti adu a bilang ti turista a mapasangbay ti siudad nangruna ta mabalin a maakomodar ti 50-K a turista tunggal aldaw iti nadakamat a bilang ti establishimento malaksid pay kadagiti dadduma nga agdagdagus kadagiti kakabagyan dagitoy.
Mainiag iti dayta, imbinglayna a mangrugi iti sumaruno a lawas ket maipaayan iti IDs dagiti agserbi kas tourist assistance wenno personnel a maidesignar iti nagduduma a paset ti siudad.
Agserbi dagiti nasao nga personnel kas lehitimo nga indibidual a mangtulong iti panakaipaay ti impormasyon wenno assistance kadagiti umili wenno bisita kabayatan ti panagturongda kadagiti tourist destinations iti City of Pines.
