BAGUIO CITY – Kidkiddawen dagiti mayor a karaman iti La Trinidad, Itogon, Sablan, Tuba, Tublay (LISTT) area ti nasapsapa ken nainget a koordinasyon kadakuada ti lokal a gobyerno ti Baguio sakbay ti pormal a panakailukat ti turismo ti siudad para kadagiti turista manipud Region 1 wenno Ilocos Region.
Iti panakiyuman ti Bombo Radyo Baguio kenni La Trinidad Mayor Romeo Salda, kinunana a naklaatda laengen idi naamuanda a mailukaten ti turismo ti Baguio para kadagiti turista ti Ilocos Region iti baet a saan pay a naikoordinar kadakuada.
Gapu iti daytoy, impaganetgetna a nasken koma pay a naipaulog ti maysa a Memorandum of Agreement iti nagbaetan ti Baguio ken probinsia ti Benguet sakbay a naaramid ti katulagan iti nagbaetan ti siduad ken kadagiti opisyal ti Rehion 1.
Kinunana a maseknan unay dagitoy gaputa adda dagiti munisipyo ti Benguet a dumalanan dagiti turista nga agturong iti siudad.
Immunan a binabalaw ni Tuba Mayor Clarita Sal-ongan ti nagbalin a desisyon ti lokal a gobierno ti Baguio gaputa sigun kenkuana ket mangitunda laeng daytoy iti saan a panagtinnunos dagiti maseknan a munisipyo ti Benguet ken ti siudad.
Kinunana a naamwanda laeng ti nasao nga addang ti Bagiuo babaen iti social media.
Impanamnama met ni Baguio City Mayor Benjamin Magalong a tutukanda ti nasao nga isyu sakbay a mailukat ti turismo ditoy lokalidad inton Setyembre 21.
