BENGUET PROVINCE – Agtultuloy ti panagturong dagiti turista iti nagduduma a tourist spot idiay Atok, Benguet.
Iti interview ti Bombo Radyo kenni Atok Mayor Franklin Smith, nagsasaruno ti panagturong dagiti turista iti nasao a lugar manipud idi Oktubre a trenta.
Nakasagana met ti kameng ti kapulisan, Municipal Disaster Risk Reduction Management (MDRRM), Bureau of Fire Protection, lokal a gobyerno ken volunteer groups a mang-asistar kadagiti turista babaen iti emergency operation center a naipasdek idiay Sayangan ken Highest Point.
Malaksid iti dayta, agarup 50% ti nagbalin kadagiti sabong gapu paylaeng iti pannakadadael dagitoy nga intunda ti napalpalabas a bagyo.
Kabayatanna, mabalbalakadan dagiti agturong a turista iti nasao a pagpasyaran nga agganadna tapno maliklikan ti aniaman nga aksidente iti Halsema road.
Iti sabali a bangir, kidkiddawen ni Mayor Smith kadagiti residente ti pannakabantay ti Halsema Road kalpasan a naipadamag ti insidente ti pannakadadael ken panagtakaw iti naikabil a cat’s eye iti kalsada a mangsalsalaknib kadagiti biyahero.
Maragsakan met ti Mayor iti pannakaipasdek ti solar lights iti Halsema nga ad-adda pay a makatulong iti proteksyon dagiti biyahero nangruna ta mapaspasaran ti naangep a kalsada/foggy road.
Malaksid iti dayta, manamnama a mapasaran ti andap wenno frost iti sumarsaruno a bulan partikular iti bulan ti Enero ken Pebrero.
Kinuna ni Mayor Franklin a nakaadal metten dagiti mannalon manipud iti napalpalabas a kapadasanda gapu ta ammodan ti imulmulada iti nasao a panawen.//Bombo Marinel Rodrigo
