BAGUIO CITY – Kidkidawen ti Department of Trade and Industry (DTI) – Baguio-Benguet ti dagus a panangireport dagiti umili kadagiti overpricing a mapasaran dagitoy kadagiti mailaklako nga oxygen tanks ken dadduma pay nga agas ti COVID-19 kasaruno ti panagngato manen ti kaso ti nasao a sakit ditoy lokalidad.
Iti panakiuman ti Bombo Radyo Baguio, kinuna ni DTI – Baguio-Benguet Consumer Protection Division Officer Richard Limpin nga agtultuloy met ti panangwanawanda kadagiti suppliers ken pasdek a mangilaklako iti nasao a produkto.
Kinunana a babaen iti daytoy ket maipasigurado nga awan ti mapasamak nga overpricing nangruna ita a manamnama a ngumato ti pagkasapulan a kas iti napasamak idi immado ti kaso ti COVID-19 iti siudad gapu iti Delta variant.
Maibasar iti kaudian a panagwanawan ti DTI – Baguio-Benguet, umdas paylaeng ti suplay dagiti oxygen tanks ken agas para iti COVID-19 isut gapuna nga awan ti pagdanagan ti publiko.
Imbalakad pay ni Limpin ti saan a panaggatang ti publiko iti online kadagiti nasao a produkto gaputa saan a maipasigurado ti kinatalged dagitoy.
