Makidkiddaw manen ti panakaadal ken panakaaramid ti implementing rules and regulations ti Anti-Distracted Walking Ordinance iti siudad ti Baguio.
Daytoy ket para iti nasaysayaat a panakaipatungpal ti ordinansa.
Iti panakiuman ti Bombo Radyo kenni Daryll Kim T. Longid, dadaulo ti Public Order and Safety Division, dadduma kadagiti provision ti nasao nga ordinansa ket “unrealistic” nangruna ta tunggal maysa ket agar-aramat ti cellphone iti agdama.
Sigun kenkuana, marigatan dagitoy a mangipatungpal iti Anti-Distracted Walking Ordinance gapu ta awan ti database nga agbalin a basaran nu ti maysa nga indibidual ket first-time offender wenno saan.
Gapu iti dayta, panangpalagip ken warning laeng ti maipapaay iti publiko.
Maibasar pay iti nasao nga ordinansa, dagiti indibidual nga aglabsing iti umuna a gundaway ket maipaayan iti warning bayat nga iti maikadua a panaglabsing ket nasken ti panangipaay ti sangapulo nga aldaw a community service.
Kinuna ni Longid nga iti kinarigat a maimplementar ti Anti-Distracted Walking Ordinance, dagiti masitsitarda laeng nga indibidual ket dagiti agar-aramat ti cellphone kabayatan ti panagdalyasatda kadagiti pedestrian lane.
Maipalagip a ti Anti-Distracted Walking Ordinance ket ti saan a panagusar iti cellphone wenno aniaman a gadget bayat ti pannagna kadagiti kalsada iti siudad.//Bombo Mera Pacpacan
