![](https://img.bomboradyo.com/baguio/2021/04/800px-Ninoy_Aquino_Stadium_COVID-19_quarantine_2.jpg)
BAGUIO CITY – Tuttutukan ita ti lokal a gobyerno ti Baguio ken dagiti medical personnel dagiti programa tapnu maksayan dagiti napumpunnon nga ospital a mangak-akomodar kadagiti pasyente a nakaptan ti COVID-19.
Iti interview ti Bombo Radyo Baguio, kinuna ni City Administrator Bonifacio Dela Peña a karaman iti ar-aramidenda tapnu maksayan ti full occupancy dagiti ospital ket ti panaka-aramid dagiti “step-down care facilities”.
Naamuan a ti “step-down care facility” ket pasilidad wenno disso para kadagiti pasyente ti COVID-19 bambantayan dagiti nars ken regular a bisitaen dagiti doktor.
Dinakamatna nga iti Baguio City Community Isolation Unit sadiay Santo Niño Hospital ket nagaramiddan iti 30-40 beds nga step-down facility a makabilan laengen kadagiti kagawaan kas iti oxygen tapnu sadiay a maiyakar dagiti dadduma a pasyente ti COVID-19 kadagiti ospital ditoy siudad.
Sigun kenkuana, dagiti laengen isolation centers ti namnama ti siudad a pakaiturongan dagiti mild cases ti COVID-19.
Kagiddan iti daytoy , impasigurado ni Engr. Dela Peña nga ar-aramiden amin ti lokal a gobyerno ti Baguio ti kabaelan daytoy tapnu maaksionan ti panakapunno dagiti COVID-19 wards kadagiti ospital ditoy siudad.