BAGUIO CITY – Inyunay-unay manen ti ama ti siudad ti Baguio ti pagkasapulan para iti nasustinir a contact tracing ken COVID-19 testing iti kampanya kontra iti agdama a pandemya.
Sigun kenni Mayor Benjamin Magalong, awan ti pakibiangna nga uray innaldaw nga ibaga ti UP-OCTA Research Team a hot spot ti Baguio City iti COVID-19.
Kinunana a ti napateg ket nakasagana ken epektibo ti amin a sistema nga isaysayangkat ti siudad tapnu malapdan ti panagwaras ti COVID-19 iti lokalidad.
Innayonna nga aw-awisenna metlaeng ti UP-OCTA Research Team ken ti Department of Health (DOH) tapnu agturongda ditoy siudad tapnu mangisayangkat ti panagsirarak ken idiligda ti sistema ti Baguio kontra iti dadduma a lokal a gobyerno.
Sigun kenkuana, babaen iti daytoy ket makita ti nasao a grupo no kasano kabileg ken ti kinapudno ti agdama a sistema ti Baguio a manglaban iti COVID-19.
Nupay kasta, inaklonna a makapaliday dagiti nasao a report gaputa itultuloy met ti Baguio a mangsustinir iti testing capacity a nagresulta iti ‘one is to 17’ wenno ‘one is to 19’ a testing capacity rate nga adayo a nangatngato no idilig iti national rate a ‘one is to 7’ laeng.
Maibasar iti report ti DOH-Cordillera, adda ita ti rehiyon iti klasipikasyon a ‘High Risk Epidemic Level’ gapu iti nangato a kaso ti COVID-19 iti nagduduma a paset ti rehion no sadino, ti Baguio City ket naipasidong iti ‘high risk category’.
