BAGUIO CITY – Ar-aramiden ti lokal a gobyerno ti Baguio ti kabaelan daytoy tapnu mabukel ti solosyon iti kumarkaro a parikut ti trapiko ditoy siudad iti baet ti agdama a pandemya.
Iti interview ti Bombo Radyo Baguio, inyulit ni Councilor Benny Bomogao, chairman ti Committee on Public Utilities, Transportation, and Traffic Legislation iti lokal a konseho ti Baguio ti pagkasapulan iti panakabukel ti regular a departamento a maawagan ti Baguio City Traffic Management Office.
Inlawlawagna a no mabukel ti nasao a departamento ket mailatangan daytoy ti pondo ken addan ti mangtutok iti panakabukel ken panakaimplememtar dagiti immediate, medium ken long-term a programa, proyekto ken aktibidad a mangrisut iti parikut ti trapiko ditoy siudad.
Sigun kenkuana, iti agdama ket agkurkurri ti Baguio City Traffic Management Office kas maysa laeng a division office.
Innayonna a naisumitir metten ti Local Public Transport Plan ti Baguio iti LTFRB tapnu maisimpa ti kaadu dagiti parapasahero a jeep a mabalin nga agbiahe kadagiti ruta ditoy siudad.
Sigun pay kenkuana, agtultuloy ti panakapasayaat dagiti traffic signs iti central business district ken kadagiti kangrunaan a kalkalsada ditoy siudad.
Inyunay-unay ni Coun. Bomogao nga awan ti perpekto a solosyon iti parikut iti trapiko ngem ti napateg ket ar-aramiden ti lokal a gobyerno ti amin a kabaelanda tapnu marisut ti nasao a parikut ditoy siudad.