BAGUIO CITY – Iyapela ti Filipino Community sadiay Russia kenni Presidente Rodrigo Duterte ti arungaingda a maikkan dagiti dagiti overseas Filipino workers (OFW) iti legal a working visa iti nasao a pagilyan iti kanito nga agkita dagitoy.
Iti panakiyuman ti Bombo Radyo Baguio kenni Marieta Padua Cion, OFW sadiay Moscow, Russia, imbinglayna a nangina unay ken narigat ti panagala dagiti OFW iti visa dagitoy tapno legal a makatrabaho sadiay Russia.
Kinunana a dumanon iti nasurok P100,000 ti nasken a busbusenda para iti visa-da nga epektibo laeng iti siyam a bulan.
Dinakamatna a daytoy ti makagapo no apay nga ado dagiti Pinoy nga awanan ti dokumento ken saan a lehitimo a mangmangged sadiay Russia.
Sigun kenkuana, iti 100 nga OFWs ket lima laeng kadagitoy ti addaan ti legal visa.
Inaklona nga iti nasurok 8,000 nga OFWs sadiay Russia ket kaaduan kadagitoy ti ‘tago ng tago’ wenno TNT malaksid pay a marigatanda iti gastos iti abang, taraon, pamasahe ken sabali pay ti kwarta nga ipatulodda ditoy Pilipinas.
Kabayatanna, naituding a makitaripnong ni Presidente Duterte iti Filipino Community sadiay Russia kas paset ti lima nga aldaw nga official visit-na iti nasao a pagilian.
Nupay kasta, naamuan a 1,500 laeng ti slot a naipaay kadagiti OFWs a dumar-ay iti taripnong gaputa limitado laeng ti laonen ti hotel a pakaipatungpalan ti nasao a taripnong. (-with Bombo Alfred Pudsoc)
