BAGUIO CITY – Ad-adalen ti lokal a gobierno ti Baguio ti panakaipalubos ti panagbiahe iti siudad dagiti nakakompleton iti bakunada kontra iti COVID-19.
Kasaruno daytoy iti temporaryo a panakaiparit ti non-essential travel iti siudad.
Iti panakiuman ti Bombo Radyo Baguio kenni City Administrator Eng. Bonifacio dela Peña, kinunana a posible a maipatungpal ti nasao nga addang iti mabiit.
Maipalagip a dagiti laeng Authorized Persons Outside Residence (APORs) ti mapalubosan nga agturong iti siudad ti Baguio gapu iti pangta ti Delta variant ti Covid 19.
Dinakamatna pay a maipalubos latta ti panagbiahe dagiti parapubliko a bus para kadagiti APORs ken dagiti addaan iti napateg a biahe.
Imbinglayna a nupay awan pay ti nailista a kaso ti delta variant iti lokalidad, nakasaganan ti siudad ken agtultuloy ti panagplanoda kadagiti addang nga ipatungpal dagitoy.
