Agparparang a dagiti mangsupsuporta kenni Vice President Sara Duterte ti manggangandat a pilaan iti impeachment complaint ni President Ferdinand Marcos Jr.
Iti press briefing, kinuna ni Palace Press Officer Undersecretary Claire Castro nga imbutaktak ti saanen nainaganan a manmanday-linteg a dagiti maawagan a DDS ti mangipila iti impeachment complaint kontra iti presidente.
Sigum kenni USec. Castro, maatap a mapangpanggep ti nasao a tignay tapno maliklikan ti bise presidente dagiti sungsungbatanna mainaig iti maatap a panangbusbos ken pangawatna iti minilmilyon a gatad iti kwarta.
Mainaig iti dayta, kinuna ti opisyal a nakasagana ni President Marcos Jr. a sumango kaspangarigan mapilaan daytoy iti impeachment complaint gapu ta raraemenna ti konstitusyon ken agtultulnog iti proseso.
Impetteng ni Atty. Castro nga awan ti imbulsa ti presidente a kwarta ken maysa a pakakitaan iti daytoy ti panangirugina iti imbestigasyon dagiti naanomalyaan a flood control projects iti pagilian.
Gapu iti dayta,kinuna ti opisyal a kumpiansa ti presidente a saan a kanunungan dagiti manmanday-linteg dagiti kurakot ngem ketdi suportaranda dagiti opisyal a natitino.
Kabayatanna,impetteng ti presidente a matrato a kas iti imbestigasyon kadagiti naanomalyaan a flood control projects ti impeachment kenni Vice President Duterte kaspangarigan maipila daytoy.
