BAGUIO CITY – Pormalen a kiniddaw ti ama ti Baguio ti panangisanod ni Land Transportation Franchising Regulatory Board (LTFRB) chairman Martin Delgra iti memorandum circular a mangimanmandato iti panakailukat ti kanayonan a prangkisa ti taxi ditoy siudad.
Sigun kenni Mayor Benjamin Magalong, ti memo ket maikaniwas iti addang ti lokal a gobyerno ti Baguio para iti panakarisut ti kumarkaro a parikut iti trapiko iti lokalidad.
Kinunana a no manayonan manen dagiti lugan nga agbibiahe ditoy siudad ket ad-adda a kumaro ti agdaman a parikut iti sitwasyon ti trapiko.
Dinakamatna a masolusyonan pay laeng ti nasao a parikut babaen iti agresibo a plano para iti panakaimaton ti trapiko.
Impeksana pay ti panakadismayana iti panakapaay ti LTFRB a mangkonsulta iti lokal a gobyerno sakbay iti panakaipaulog ti nasao a memo.
Naamuan a nakaawat ni Mayor Magalong iti petisyon manipud kadagiti taxi operators, drivers ken stakeholders iti siudad a mangtubtubngar iti presensia dagiti kanayonan a prangkisa ti taxi ditoy Baguio.
