![](https://img.bomboradyo.com/baguio/2019/08/compost.jpg)
BAGUIO CITY – Patien ti ama ti siudad ti Baguio nga agtultuloy iti napintas a panakamintinir dagiti Environmental Recycling System (ERS) machines iti Irisan Dumpsite nga agpapataud kadagiti abono.
Inwaragawag daytoy ni Mayor Benjamin Magalong kalpasan ti panag-inspeksionna manen iti Irisan Dumpsite idi agsapa.
Sigun kenkuana, gapu iti napintas a panakaiproseso ita dagiti marunrunot a basura babaen kadagiti ERS machines ket napintas met dagiti napataud nga abono.
Dinakamatna nga addan ti kontraktor a manggatang kadagiti napataud nga abono manipud kadagiti marunrunot a basura iti gatad a P3 tunggal kilo.
Impannakkelna a babaen iti daytoy ket addan ti maur-or ti siudad a pondo manipud iti nasao a pagproseso-an ti basura ken daytoy ti kaunaan a gundaway a makailako ti lokal a gobyerno iti abono manipod naimuntar dagiti nasao nga ERS machines idi 2010.
Innayonna pay a daytoyen ti kapintasan, kadalusan ken kasayaatan nga abono nga improseso dagiti nasao a makina. (with Bombo Nikki Agsiweng)