BAGUIO CITY – Awan ti basol dagiti opisyal ti Barangay Dominican Mirador ditoy Baguio City iti panakairuar dagiti datos iti nagpositibo iti COVID-19 sadiay.
Iti panakiyuman ti Bombo Radyo Baguio kenni Punong Barangay Remedios Laigo, kinunana a mapabpabasolda iti nasao a banag.
Impettengna a confidential ti detalye dagiti nagpositibo iti nasao a sakit isut gapuna a saan a rumbeng a mairuar iti publiko.
Innayonna a ti lokal a gobierno ti siudad ken dagiti maseknan nga opisina ti mangipabpablaak kadagiti detalye ken saan met a madakdakamat dagiti nagan a pakabigbigan kuma dagiti nasao nga indibidual.
Sigun pay iti kapitan, awan ti karbenganda a mangipablaak kadagiti nasao a detalye.
Kabayatanna, dumanon itan iti 24 ti bilang dagiti nagpositibo iti COVID-19 sadiay Barangay Dominican Mirador, no sadino, maysa ti pimmusay.
Kinuna pay ni Kapitan Laigo a naisayangkat metten ti contact tracing kadagiti nakapulapol dagiti kabarbarao a kaso ti COVID-19 sadiay ken maur-uray laengen ti resulta ti COVID test daytoy.
