Inyunay-unay ni Representative Raul Bongalon a ligal ken valid ti panakaiyulog ti warrant kenni sigud a President Rodrigo Roa Duterte gapu ta inkoordinar daytoy ti International Criminal Police Organization wenno Interpol iti pagilian no sadino paset ti pagilian iti nasao nga organisasyon.
Gapu iti dayta, adda ti responsibilidad ti pagilian a mangimplementar iti nasao a warrant.
Sigun kenni Bongalon, saan nga iligal ti panakaarestar ni Duterte gapu ta dimmalan daytoy iti proseso ken nakabasar daytoy iti international rules.
Kinuna pay ti nasao nga opisyal a ti panagimbestigar ti International Criminal Court maipapan iti extrajudicial killing ket narugian sakbay nga immikat ti pagilian a Pilipinas iti daytoy rason nga addan ti jurisdiction ti ICC iti nasao a kaso.
Maipalagip a ti panagserrek ti International Criminal Court iti maysa a kaso ket no daytoy ket “crime against humanity” ken no makitkitada nga awan ti umno a prosecution a naipatungpal.
