BAGUIO CITY – Irekrekomendar ti lokal a gobyerno ti Itogon, Bennguet ti panakakissay dagiti pamilya nga agnanaed kadagiti bunkhouses dagiti kompanya ti minas iti masakupan ti munisipyo ken ti panakabaliw ti disenyo dagitoy.
Iti panakiuman ti Bombo Radyo Baguio, inlawlawag ni Mayor Victorio Palangdan a babaen iti daytoy ket maliklikan ti agtultuloy a local transmission wenno panakaiyakar ti coronavirus kadagiti agnanaed kadagiti bunkhouses sadiay, nangruna kadagiti minero ken kadagiti pamilya dagitoy.
Sigun kenkuana, naobserbaran ti agtultuloy a panakailista ti kaso ti COVID-19 kadagiti bunkhouses dagiti minero sadiay isut gapuna a kasapulan ti panakakissay dagiti agnanaed kadagitoy wenno ti panakabaliw ti disenyo ti pasilidad tapnu maksayan ti kinailet kadagitoy.
Impettengna a maysa a rason iti killaat a panagadu ti kaso ti COVID-19 kadagiti mining camps sadiay Itogon idi napalpalabas a bulan ket ti kinailet ken ti kasasaad dagitoy nga addaan ti maymaysa a kusina, comfort rooms ken dadduma a pasilidad a nalaka a pakapasamakan ti panaginnakar ti virus.
Inyunay-unayna met a no maksayan dagiti agnanaed kadagiti bunkhouses ket maipasigurado a masurot dagiti standard health protocols kontra iti COVID-19 kas iti social distancing.
Inaklon ni Mayor Palangdan nga adda dagiti naawatna a reklamo manipud kadagiti kompanya ti minas ngem inkalintegtanna a babaen iti rekomendasyonda ket maliklikanen ti panagwaras ti COVID-19 iti mining areas sadiay Itogon.
Iti baet daytoy, mangnamnama ti mayor nga agtungpal dagiti tallo a kompanya ti minas sadiay Itogon iti rekomendasyonda para iti kinatalged dagiti minero ken dagiti dadduma nga umili ti munisipyo.
