BAGUIO CITY – Maisaksakad iti Sangguniang Panlalawigan ti Benguet ti panakabaliw ti ordinansa ti probinsia a mangipapay iti insentibo kadagiti Barangay Health Workers, Child Development Workers ken Barangay Nutrition Scholars.
Tarigagay ti awtor ti gakat a maipaayan iti kanayonan nga insintibo ken benipisyo dagiti nasao nga indibidual nga agserserbi iti babbarangay kas panangbigbigda iti kontribusyon dagitoy.
Maisaksakad ti panang-sponsor ti gobyerno iti panagmiembro dagiti nadakamat a workers ken scholars iti PhilHealth Insurance Coverage tapnu makaala dagitoy iti napimpintas a serbisyo kadagiti pagagasan.
Maipaayan met laeng dagiti benipisaryo iti libre a tinawen a konsultasyon kadagiti pagagasan ti gobyerno.
Maad-adal pay ti panakaipaay ti P2,500 nga insentibo kadagiti workers ken scholars tunggal Disyembre ken P1,000 a retirement tunggal tawen para kadagiti nagserbi iti nasurok 15 a tawen iti barangay.
Maibasar iti immunan nga ordinsa, makaaw-awat laeng iti P500 nga honoraria ken P500 a financial assistance dagiti nasao a workers manipod iti provincial government ti Benguet.
Posible pay a maipangato dagiti nasao a gatad depende iti mailatang a pondo.
