BAGUIO CITY – Agtultuloy ti imbestigasion ti Tabuk City Police Station tapno maduktalan ti kinasiasino dagiti suspek iti pannakapaltog ti maysa nga estudiante a lalaki sadiay Tabuk City, Kalinga idi Disiembre 27, 2019.
Immunan a nabigbig ti biktima a ni Xiolie Balawan, 18 anyos ken residente ti barangay Balantoy, Balbalan.
Maibasar iti report, imanmaneho ti biktima ti maysa a motorsiklo ken kadwana ti pagayamna, agturong koma dagitoy sadiay barangay Dagupan.
Idi nakadanonda iti batog ti Barangay Hall ti San Juan ket nakitada ti tallo a lallaki nga agpukpukaw kabayatan ti pannagna dagitoy.
Idi nakalabas ti biktima ken ti kadwana ket nakangegda iti kanalbuong iti paltog ken narikna ni Balawan a napuntaan iti bala ti kannawan nga abagana.
Gapu iti daytoy, ti kadwa ni Balawan ti nangimaneho iti motorsiklo ken kalpasanna ket naiturong daytoy iti ospital ken adda itan iti natalged a kasasaad.
Umap-apela ti pulisya iti asinoman nga addaan impormasion maipapan kadagiti suspek tapno ireporda daytoy kadagiti otoridad.
