Balligi ken nakappia a naipatungpal iti panakaselebrar ti Eid Al-Adha wenno “feast of sacrifice” iti siudad ti Baguio.
Daytoy ket maysa kadagiti kangrunaan a holiday a ramramabakan dagiti Muslims iti sangalubungan.
Iti panakiuman ti Bombo Radyo kenni Imam Samsodin Monib, Presidente ti Baguio – Benguet Muslim Community, ti Eid al-adha ket wagas tapno maipalagip kadakuada ti nagdalanan daydi propeta a ni Ibrahim no sadino saan daytoy a malipatan ti muslim community.
Kabayatanna, kinuna ni Gary Salacop- Acting Chief of the Cultural Affairs Division National Commission on Muslim Filipinos a daytoy ti maikadua a kadakellan nga okasyon para kadagiti muslim.
Inlawlawag met ni Salacop ti nagdumaan ti Eid al-Fitr ken Eid Al-Adha no sadino ti Eid al-Fitr ket maipapan iti bulan iti panagleppas ti Ramadan ken daytoy ti kadakellan nga aldaw iti Islam bayat a ti Eid al-adha ket ti panagsakripisyo ti propeta a ni Ibrahim iti bugbugtong nga anakna a ni Ismail.
Iti sabali a bangir, impakaammo ni Monib a nu ikumpara ti attendance wenno kinaado ti tao iti Eid al-Fitr ken Eid al-adha ket mas ado ti tao no selebrasyon ti Eid al-Fitr.
Nangipaay met ni Mayor Benjamin Magalong iti mensahe no sadino impeksana a sagrado ti nasao nga okasyon kadagiti kakabsat a muslim gapu ta mangipasimudaag daytoy iti panagsakripisyo iti tunggal maysa.
Malaksid iti dayta, nagyaman met daytoy kadagiti muslim community gapu ta peaceful ti koordinasyon daytoy iti lokal a gobyerno.//Bombo Noveh Organo
