BAGUIO CITY – Naangay ditoy siudad ti Baguio ti taripnong ti Technical Working Group ti Senate Committee on Local Government mainaig iti dua a gakat a naipila sadiay Kongreso seknan iti panakarebisa ti charter ti Baguio City.
Dagitoy ket ti House Bill No. 8882 a pinutar da Baguio Representative Mark Go ken Kalinga Representative Allen Jesse Mangaoang ken ti Senate Bill No. 2163 a pinutar ni Senator Imee Marcos.
Nailukat ti sesyon babaen iti panangilawlawag ni Senate Committee on Local Government chair Senator Francis Tolentino iti kinapateg ti panakaipasa ti dua a gakat.
Dinayawna met dagiti addang tapnu marebisa ti charter ti Baguio gaputa daytoy ti agserbi a pagtuladan kadagiti dadduma a siudad, partikular ti panagresponde iti agbalbaliw a panawen ken ti agbalin nga epektona iti masungad a panawen.
Kangrunaan a natalantan iti sesyon dagiti nailanad a termino iti gakat kas iti territorial boundaries, city officials, board and councils ken ancestral land.
Immunan a naaprobaran iti Senate Committee on Local Government ti Senate Bill No. 2163 ngem inlanadda a nasken a maurnos dagiti dadduma a probisyon daytoy babaen iti Technical Working Group.
Naituding met a matalantan dagiti dadduma a probisyon dagiti nasao a gakat inton Martes, June 29.
Dimmar-ay pay iti sesyon dagiti opisyales ti siudad iti panangidaulo da Mayor Benjamin Magalong ken Congressman Go malaksid pay kadagiti maseknan a departamento ti gobyerno.
