Temporaryo a nagsardeng ti Search, Rescue and Retrieval Operations dagiti maseknan nga otoridad ita a rabii para iti pannakabiruk iti 14-anyos a nalmes iti Bayudan River sadiay Bugnay, Supang, Sabangan, Mountain Province idi laeng kalman.
Nabigbig ti biktima a ni Juneil Crey Liwaliw Bagwan.
Iti pannakiuman ti Bombo Radyo kenni Bontoc Mayor Jerome “Chagsen” Tudlong Jr., a nagsardeng ti panagbiruk dagitoy ita a rabii ngem intuloyda manen inton bigat.
Sigun kenkuana, nakaawat dagitoy iti tawag manipud iti mayor sadiay Sabangan seknan iti nasao nga insidente rason a dagus met naideploy dagiti maseknan nga otoridad ken naalerto dagiti Local Disaster Risk Reduction and Management Offices (LDRRMOs) ken dagiti residente.
Nupay kasta, marigatan dagitoy gaputa nalibeg wenno kulay brown ti danum iti nasao a karayan.
Gapu iti dayta, inyunay-unayna iti publiko nangruna dagiti residente nga agbalin dagitoy a naridam nangruna kadagiti asideg ti karayan.
Namnamaenna met a dagus daytoy a mabirukan bayat nga agkidkiddaw daytoy iti kararag para iti pannabiruk daytoy.
