Idagdagadag ni Senador Joel Villanueva iti senado ti naan-anay a pannakaimbestigar kadagiti “unprecedented number” ti text scam a mainaig iti sugal.
Gapu iti daytoy, nangipila ni Villanueva iti Senate Resolution 1057 bayat nga impettengna dagiti biliang dagiti SIM cards a nadiskubre bayat ti napalpalabas a panagraid dagitoy kontra kadagiti Philippine Offshore Gaming Operators (POGO) hubs.
Sigun kenkuana agarup 80,000 a registered ken unregistered SIM cards ti nadiskubre iti Philippine Offshore Gaming Operators (POGO) idiay Las Piñas bayat a 28,000 a registered ken unregistered SIM cards ti nadiskubre idiay Pasay City.
Malaksid iti dayta, impetteng pay ni Villanueva a ngimmato ti panagaramat kadagiti simulators wenno stingrays wenno international mobile subscriber identity (IMSI) catchers tapno mangloko iti dadduma pay.
Iti panangipilana iti nasao nga addang, impaganetgetna a kasapulan nga agtignay ti gobierno tapno adalen ken idetermineda dagitoy tapno maliklikan dagiti text scams.//Rose
