BAGUIO CITY – Inyunay-unay ni Baguio City Mayor Benjamin Magalong ti panangipangruna dagiti pulis iti human rights iti tunggal panangisayangkatda iti aniaman nga operasyon.
Reaksion daytoy ti sigud a heneral kagiddan ti nabara nga isyu iti police brutality wenno ti panakairaman dagiti pulis iti nagduduma a krimen.
Sigun kenkuana, nasken a kanayon a maipalpalagip ken maipaspasagepsep kadagiti pulis dagiti PNP Police Operational Procedures, pakairamanan ti panagrespeto iti human rights ken panagsurot iti linteg.
Innayonna nga uray ania ti rekord iti biag dagiti puntirya ti operasyon ket nasken a maipangruna latta ti karbengan dagitoy kas maysa a parsua.
Nupay kasta, dinakamatna a no mamingsan ket masobsobraan ti gagar dagiti pulis nga agpataud ti resulta gapu iti pressure nga agtataud iti organisasyon partikular iti panangpataudda iti resulta.
Maipalagip nga itay laeng nabiit ket nababalaw ti pulisya gapu iti panakairaman ti dua a pulis iti Regional Drug Enforcement Unit ti Cordillera Police iti panakakawtibo ken panakapapatay ti maysa a residente ti Baguio City ken iti panangpalpaltog ti maysa a pulis iti agina a nagresulta iti ipupusay dagitoy sadiay Tarlac.
