Nagpalagip ti Traffic Enforcement Unit ti Baguio City Police Office kadagiti motorista a planwenda iti nasapsapa dagiti biyahe dagitoy kagiddan dagiti agsasaruno a parada a maipatungpal iti Baguio City intn bigat ken inton aldaw iti Dominggo.
Iti panakiuman ti Bombo Radyo kenni Police Major James Allen Dogao, dadaulo ti Traffic Enforcement Unit ti Baguio City Police Office, kinunana a nasken a planado ti biyahe dagiti motorista kasta metten a masapol nga ammoda dagiti kalsada a maiparekep tapno saan dagitoy a maipit iti trapiko.
Sigun kenni PMaj.Dogao, mangiruar dagitoy iti advisories maipapan kadagiti kalasada a maiparekep alas tres ti malem ita nga aldaw para iti parada iti anibersaryo iti Baguio Country Club.
Sigun kenni Pmaj. Dogao, karaman kadagiti kalsada a naiparekep ti paset ti Session Road, Harrison Road ken Magsaysay Avenue.
Innayon ti opisyal a mabalin a bisitaen ti publiko ti BCPOViewBag App tapno maamoanda dagiti sitwasyon iti nagduduma a kalsada iti siudad
Imbinglayna pay a naactivate ti Bakasyon Lane tapno kaspangarigan saan a kasapulan a magna dagiti motorista iti Central Business District ket aramatenda dagiti daduma nga alternatibo.
Kabayatanna, nakikoordinar metten ti Traffic Enforcement Unit iti siudad para iti panakaimanehar ti gunay ti trapiko nangruna iti mapadpadaaanan a Grand Street Dance Parade inton bigat ken ti Grand Floral Float Parade inton Domingo.
Impalagip met ni Dugao a maipatungpal ti number coding scheme iti siudad rason a nasken a sumurot ti publiko iti nasao a pagalagadan.//Bombo Mera Pacpacan
