Nagpalagip manen ni La Trinidad Mayor Romeo Salda kadagiti umili iti masakupanna a munisipyo kasta metten kadagiti kabangibang a lugar nga agalwad dagitoy kagiddan ti mapaspasaran a bagyong Enteng.
Iti pannakiuman ti Bombo Radyo kenkuana, kinuna a kasapulan a suruten ti publiko dagiti precautionary measures, imonitor dagiti aglawlaw ti balayda ken dalusan dagiti kanal tapno maliklikan ti panaglayos iti arubayan.
Sigun kenkuana, awan met ti naireport a landslides iti nasao a munisipyo kasta metten kadagiti flood prone area sadiay.
Nupay kasta, namnamaenna a sapay kuma ta agsardengen ti bagyo tapno saan a maapektaran dagiti umili kasta metten dagiti mula dagitoy.
Maipalagip met nga immunan a nangipaulog daytoy iti class suspension dagiti Senior High School agingga iti elementarya idi laeng kalman.
Iti agdama, adda met dagiti volunteers nga agrikrikos kadagiti babbarangay iti nasao a munisipyo tapno mamonitor no adda man ti saan a nasayaat nga insidente kagiddan ti bagyo.
