BAGUIO CITY -Inaklon ni Baguio City Mayor Benjamin Magalong a sumangsangoda ita iti parikot seknan iti panggep ti lokal a gobyerno a panankaipasdek ti environmentally-friendly a waste-to-energy iti maysa a pribado a lote sadiay Sablan, Benguet.
Sigun ken Mayor Magalong, agingga iti agdama ket saan pay a nakapagdesisyon dagiti maseknan nga indibidual iti nasao a munisipyo maipapan iti nasao a proyekto.
Maipalagip a nakitaripnong dagiti opisyales ti Baguio City kadagiti miembro ti Benguet Provincial Board, Sablan Municipal Council, ti proponent a korporasyon ken dadduma pay a maseknan nga ahensia ti gobyero.
Ditoy a natalantan dagiti detalye ti nasao a proyekto ken dadduma pay nga isyu a rumbeng a marisut.
Sigun iti taripnong, pabor ti kaaduan a konsehal iti Sablan iti nasao a panggep ken tumultulong met ti agtagikua iti lote a mangrisut kadagiti pakaseknan dagiti tattao a pakairamanan ti relokasyon dagiti babbalay a maapektaran iti proyekto.
Gapu iti dayta, pappapartaken ni Mayor Magalong ti panakaipatungpal dagiti kaskenan a proseso para iti panakaipaay ti permit iti proyekto tapnu permanente metten a masolusyonan ti parikut iti panakaimaton dagiti basura iti Baguio-La Trinidad-Itogon-​Sablan-Tuba-Tublay (BLISTT) ken mapataud pay ti kanayonan a suplay ti kuryente para iti Luzon.
Immunan nga impannakel ti mayor nga iti kanito a maipursige ti proyekto ket mabigbig ti BLISTT kas kaunaan nga LGUs iti pagilian nga addaan iti bukod nga state of the art waste-to-energy facility.
Kabayatanna, manarimaan metten ti pannakaipatungpal ti survey iti maysa a pribado a lote nga indonar iti lokal a gobyerno ti maysa nga indibidual para met iti posible a pannakaipasdek ti kapadana a proyekto para iti syudad.
