Plano ti Commision on Elections wenno COMELEC nga ikkaten ken iparit ti ‘substitution by withdrawal’ kadagiti agkandidato iti 2025 Local ken National Elections tapno maliklikan dagiti nagduduma parikut.
Ti substitution by withdrawal ket ti pannakasukat ti kandidato gapu iti panagsanudna wenno saanna a panagtuloy a tumaray iti eleksyon.
Iti pannakiuman ti Bombo Radyo kenni Atty. Julius Torres, Regional Director ti Commission on Elections (COMELEC) – Cordillera, rumbeng laeng a maiparit ti ‘substitution by withdrawal’ nu nalpasen ti deadline ti panangipila ti kandidatura.
Impetteng ni Atty. Torres a naisingasing daytoy gapu ta naobserbaran a pagbalbalinen dagiti dadduma a kandidato a linu-luko ti panagtarayda iti pwesto.
Inyunay-unay ti nasao nga opisyal a sakbay a mangipila dagiti kandidato ti certificate of candidacy dagitoy ket nasken nga adalenda pay a nalaing nu desidido dagitoy nga agserbisyo iti komunidad.
