Manarimaan a maad-adal ti pannakaamyendar ti City Ordinance 19- 2021, wenno ti Responsible Dog Ownership Ordinance iti siudad ti Baguio City para iti panakaipangato ti penalties kadagiti pet owners nga aglabsing iti nasao nga ordinansa.
Iti pannakiuman ti Bombo Radyo kenni Rocky Aliping, Presidente ti Liga ng mga barangay, kinunana nga impetteng ti mayor ti panakaipangato ti multa kadagiti walang nga aso, busara ken littering.
Nupay kasta, kinunana a nasken paylaeng nga adalenda daytoy kaduada dagiti maseknan nga opisina tapno mapagtatalantan dagiti kasapulan a maikonsidera.
Rimuar daytoy a pakaseknan kalpasan a nakaawat dagitoy iti reklamo maipapan kadagiti walang nga aso ken dagiti rugit dagitoy kadagiti kalsada.
Kabayatanna, iti met pannakiuman ti Bombo Radyo kadagiti sumagmamano a barangay official, kinunada nga awan ti trainings a nagdalanan dagitoy para iti umno a panagtiliw iti aso rason a mabutengda a makagat.
Dadduma pay kadagitoy, kinunada nga awan ti nawaya a pagkulungan no dagitoy ti mismo a mangtiliw kadagiti walang nga aso.
Gapu iti dayta, kinuna ni Aliping a masanay dagiti barangay officials tapno saanen a kasapulan nga agpatulong dagitoy iti City Veterinary and Agriculture Office.//Bombo Noveh Organo
