SAUDI ARABIA – Manarimaan paylaeng ti pannakaiproseso ti papeles ti Overseas Filipino Worker (OFW) a pimmusay iti aksidente idiay Riyadh Road, Urairah, Eastern Province, Saudi Arabia a nakadangran metlaeng dagiti dua a kakaduana a Pilipino idi Hulio 23, 2024.
Iti interview ti Bombo Radyo Baguio kenni Reywel Soriano manipud Aritao, Nueva Vizcaya, a maysa kadagiti nadangran a Pilipino iti nasao nga aksidente, kinuna a ti pimmusay iti nadakamat nga aksidente ket mismo daytoy a barkada ken katrabahuanna a ni Marvin Delos Santos Sanchez manipud Bagong Silang San Jose Occidental Mindoro.
Innayonna a ti kadua dagitoy a nadangran ket ni Arcenio Cadorna manipud Quirino, Isabela.
Sigun kenkuana, nagballasiwda iti kalsada ti Al-hasa babaen ti pickup truck a minaneho ti katrabahuanda a taga Sudan idi kellaat a napukaw ti drayber ti kontrol ti manibela rason a bimmaliktad daytoy iti agarup innem agingga walo a daras.
Ditoy met a naiparwak paruar iti lugan ni Sanchez a nangitunda iti ipupusayna.
Napasamak ti insidente iti pasado alas dose iti tengnga ti rabii ngem narescua laeng dagitoy iti pasado alas dos iti parbangon.
Naitaray met dagitoy iti Prince Sultan Bin Abdulaziz Hospital idiay Urairah, Eastern Province ngem saan a naispal ni Sanchez.
Nagsagrap da Soriano ken Cadorna iti sugat iti nagduduma a paset ti bagida dagitoy, ngem agingga iti agdama ket marikriknada paylaeng ti sakit daytoy.
Impagarup met ni Soriano a napasamak ti aksidente gapu iti panagaramat ti driver iti selpon daytoy bayat nga agmanmaneho.
Malaksid iti overspending ken overloading gapu ta innem dagitoy a naglugan iti pick-up kaduada ti dua nga indian ken Bangladeshi national.
Kabayatanna, naammuan pay kenni Soriano a doble ti marikna ti pamilia ti pimmusay a ni Sanchez gapu ta kaitabtabon laeng ti pimmusay nga inana idi Hulio 22, 2024 ken natay met dagiti dua a kakabsatna gapu iti aksidente iti motorsiklo itay napan a tawen.
Naulila ni Sanchez ti asawana ken dagiti dua a tin-edyer nga annakna.//Bombo Alfred Pudsoc & Bombo Rosemarie Bulsao
