Balligi ti pannakarambak ti Cordillera Festival of Festivals ita nga aldaw.
Sigun kenni Department of Tourism-Cordillera Regional Director Jovita Ganongan, ti Cordillera Festival of Festivals ket paset ti panagregget ti Department of Tourism Cordillera tapno mabigbig a Cultural Tourism Destination iti rehiyon.
Kinunana a nabaknang ti kultura iti rehiyon ken maysa daytoy kadagiti nalatak nu maipapan iti tradisyon ken namamaris a kultura.
Innayonna pay a ti Cordillera Festival of Festivals ket gundaway tapno maipaayan ti dakdakkel pay nga audience dagiti dadduma pay a festival iti rehiyon.
Mainaig iti dayta, kinunana a maragsakan daytoy gapu ta umad-adu dagiti mangayat a makipaset iti Cordillera Festival of Festivals tapno maitampok dagiti namaris a kultura ken tradisyon dagiti bukodda a probinsya.
Planoda metlaeng a padakkelen pay daytoy nga aktibidad ngem nupay kasta, malimitaran paylaeng daytoy para kadagiti innem a probinsya iti rehiyon ken dagiti dua a siudad a Baguio ken Tabuk.
Daytoy ket tapno mabigbig ken mai-differentiate ti nagdumaan dagiti sala ken kultura ti tunggal probinsya.
