Tarigagay ni Jerrold Pete Mangliwan manipud Kalinga a makagun-od ti medalya iti Paralympian Paris 2024 a maangay inton Agosto 28 agingga Setyembre a otso ti agdama a tawen.
Iti panakiumanan ti Bombo Radyo kenni Mangliwan, ti medalya manipud iti Paralympian Paris ti ur-urayenna a mangkompleto kadagiti daduma a medalya a nagun-od daytoy manipud kadagiti ASEAN Games, SEA Games, World Championship ken daduma pay.
Sigun kenni Mangliwan, agtultuloy ti panag-ensayona para iti manamnama a kompetisyon sadiay Pasig, sakbay nga agturongda idiay France.
Kinuna ni Mangliwan nga iti panag-ensayona ket saan laeng a maipapan iti pisikal a preparasyon nu diket maipapan metlaeng iti mental a preparasyon tapno nakakondisyon ti amin.
Kabayatanna, pangpanggepen ni Mangliwan nga ad-adda pay nga ipakaammona iti pagilian dagiti Para Games nangruna iti rehiyon Cordillera gapu ta tunggal maysa ket addaan kapabilidad.
Kiddaw met ni Mangliwan ti panakainayon dagiti Persons with disability (PWD) kadagiti nagduduma nga ay-ayam iti pagadalan tapno ag-excellda pay kasta met ti panakaipaay ti suporta ken atensyon kadagitoy.//Bombo Mera Pacpacan
