Baguio City- Naibinsa-binsa iti public consultation ti parikut dagiti maipapan iti danum a nasken nga aksiyonan ti Baguio Water District.
Iti pannakiuman ti Bombo Radyo kenni David Mendoza, residente ti Manga Road, Loakan Airport, problemada ti masansan a saan a pannakasurot ti aldaw ken oras nga schedule ti panagsangpet ti danum iti lugarda.
Innayonna nga adu dagiti nadadael a tubo isu’t gapuna a masaysayang laeng dagiti danum.
Dinakamat ni Mendoza nga impakaammodan daytoy kadagiti personnel ti Baguio Water District ngem sigun kenkuana ket nabuntog ken nabayag ti pannakaipaay ti aksyon.
Malaksid iti dayta, pakaseknan pay dagiti umili ti Loakan ti bassit a danum a sumangsangpet kadagiti babbalayda nangruna kadagiti nangangato a disso.
Kabayatanna, impasigurado met ni Engr. Salvador Royeca, General Manager iti Baguio Water District a kitaenda dagiti nadakamat a problema nangruna dagiti nadadael a tubo.
Inaklonna a parikut ken kurang ti water source iti nasao a lugar ngem kinunana a manarimaan ti panangsapulda iti kanayunan a pagtaudan ti suplay ti danum iti nasao a barangay.
Mainaig iti daytoy, isingsingasing ita ti Baguio Water District ti pannakapaipangato ti minimum rate ken cubic ti danum.//Bombo Genzel Depayso
