Inyangaw ni President Ferdinand Marcos Jr. kadagiti mangnamnama a maikkat daytoy iti takemna a saan unay dagitoy a magagaran.
Ti statement ti presidente ket kasaruno ti panakaipakaammo a nadiagnose daytoy iti diverticulitis— maysa a kondisyon mainaig iti colon.
Kagiddan dayta, impatalged ti presidente a saan a life-threatening ti kondisyon daytoy ken awan ti rumbeng a pagdanagan seknan iti salun-atna.
Dinismisar metlaeng ti presidente ti naipadamag maipapan iti ipupusay daytoy nga inladawanna nga highly exaggerated.
Sigun kenkuana, nasayaaten ti marikriknana iti agdama ket narisuten ti problema.
Inlawlawagna a ti nasao a sakit ket gagangay laeng a mapaspasaran dagiti kapadana a mais-istres kasta metten nga adda pakainaigan daytoy iti manaynayonan nga edadna.
