Impakaammo ni Baguio City Mayor Benjamin Magalong a naobserbarandan ti “significant” a panagababa ti pila kadagiti paradaan iti jeep iti siudad kasaruno ti panakitungtong ti lokal a gobyerno kadagiti driver ken operators ti public utility jeepney (PUJ) nga ilaylayonda ti panagpasada dagitoy nangruna iti rabii.
Immuna ngaminen nga impeksa dagiti daduma a komyuter ti parikutda gapu iti kinakurang dagiti agpaspasada a jeep nangruna tunggal rabii wenno panaggaawid.
Tapno marisut wenno mapalag-an ti sitwasyon,impaayan ti lokal a gobyerno ti sag-lima ribo a piso a financial aid dagiti nasurok 1,900 a jeepney drivers iti siudad.
Dagiti ngamin drivers ken operators ket karaman kadagiti nakaro a maap-apektaran iti panagngato iti presyo dagiti produkto a petrolyo nga ituntunda met ti agtultuloy a tension idiay Middle East.
Malaksid iti panakaipaay iti tulong pinansyal, manarimaan metten ti panakaipaay ti libreng sakay usar dagiti lugan ti nagduduma nga opisina iti lokal a gobyerno iti siudad ken dagiti daduma pay nga ahensya.//Bombo Rob Dominguez
