BAGUIO CITY – Inlawlawag ni Mayor Victorio Palangdan a ligal ti panggep a pannaka-ipangato manen ti tailings Storage Facility (TSF) 2 ti Benguet Corporation sadiay Itogon, Benguet.
Nagpalawag ti mayor kalpasan ti tignay-protesta nga inpatungpal dagiti residente ti Tinongdan, Dalupirip ken Poblacion kas panangkontra iti nasao nga aktibidad idi kalman.
Iti interbyu ti Bombo Radyo-Baguio ken ni Palangdan, kinunana a dimmalan iti umno a proseso ti pannakaipangato manen ti tailings dam ti nasao a korporasion gapu ta naiyuman daytoy iti Mines and Geosciences Bureau (MGB), Environmental Management Bureau (EMB), ken National Commission on Indigenous Peoples (NCIP) kasta metten a naipatungpal ti public consultation.
Kinunana a kalpasan ti panagadal ket inwaragawag dagiti kompania a naurnos ti stability ti proyekto.
Gapu iti daytoy, kinunana a saanen a mabalin a maisardeng ti aktibidad ti Benguet Corporation ken mabalin a makasuan dagiti residente no lapdanda ti pannakaipangato ti tailings dam.
Dinakamatna a saan metten daytoy a mabalin a mangipaulog iti stoppage order gapu ta adda ti permiso a naala ti kompania.
Inlawlawag ni Palangdan a tubtubngaren dagiti residente ti pannakaipangato manen ti tailings Storage Facility (TSF) 2 ti Benguet Corporation gapu ta amkenda a delikado daytoy.
