Nagpalagip ti National Police Commission (NAPOLCOM) kadagiti police officers a mabalin dagitoy a rambakan ti paskua iti uneg dagiti opisina ken police stations ngem nainget a maipawil ti panaginum iti arak.
Gapu iti dayta, nagballaag ni vice chairperson and executive officer Rafael Vicente Calinisan kadagiti police officers a dagus a maikkat dagitoy iti posisyon iti kanito a maduktalanda a nakakainum dagitoy iti arak bayat a nakaduty kadagiti opisina dagitoy a naka-uniporme pay.
Kinunana a saan met a maipawil ti agragsak ken agrambak agsipud ta amin ket agragsak ita a Christmas season la ketdi saan nga uminom iti arak iti trabaho.
Impettengna metlaeng a saan a dakes a mangan ken agrambak, malaksid laeng iti panaginum iti arak.
Innayonna pay a napateg para kadagiti police officers a respetuen ti uniporme ti Philippine National Police (PNP).
