BAGUIO CITY – Naka-blue alert ita ti Baguio City Disaster Risk Reduction Management Council kas panagsaganada iti obserbasion ti Semana Santa ken ti posible nga epekto ti bagyo nga Agaton ken ti bagyo a Malakas.
Kasaruno daytoy ti memorandum no. 79, series of 2022, nga impaulog ti mayor ti siudad, a mangipaspasidong iti CDRRM Office-Emergency Operations Center (EOC) iti blue alert manipud Abril 11 agingga Abril 18.
Naimandato metlaeng kadagiti amin a DRRM committees iti tunggal barangay partikular dagiti daydaywen dagiti bisita tapno agbalinda nga aktibo a mangwanawan kadagiti masakupanda tapno dagus a marespondeanda dagiti saan a mapakpakadaan a pasamak.
Naimandato pay ti panagsagana ti City Engineers Office, City Environment and Parks Management Office, City Health Services Office (CHSO) ken daduma pay nga opisina tapno mangipaayda ti medical services, personal protective equipment, communication ken transportation services.
Aktibo met ita ti AFP Reserve Units, BB-PICAG, Baguio 911, civic communications ken rescue groups a tumulong kadagiti nadakamat nga opisina.
